السلام عليكم ورحمة الله وبركاته
هذه قصيدة الشاعر / تركي عطا الله الميزاني (( تركي 2000))
في مسابقه شاعر المليون والذي حصل على المركز الثاني في
المسابقه وهذه القصيده بعنوان : سيرة بطل
فقد كانت قصيدة راقية في المعنى والمضمون ,, ولعل اتصال سمو
الأمير سلمان بن عبدالعزيز ,, بشاعرها تركي المطيري ( أو تركي
2000 ) وإطلاق لقب شاعر الوطن عليه ,, لهو أكبر فخر للشاعر
تركي 2000 وأكبر دليل على جزالة القصيدة أيضاَ ,,
يافالق الصبـح يامولـج نهـارك بليـل
ياجامع الناس في يوم البعـث و النشـور
عليك كـل إتكالـي وأنـت نعـم الوكيـل
يا عالـم بالمصيـر و ماتكـن الصـدور
يالله يالله تهديـنـي ســواء السبـيـل
و تعصم لساني عن الزله وعن كـل زور
الشعر موقف وحده مثـل حـد الصقيـل
لو كان كتله من احساس البشر والشعور
يامـا رقابـي ورقيتـه بـراس الطويـل
وياما سبح بي بحور وغصت به في بحور
وانا ليا حـان ميقافـي قبسـت الفتيـل
و اوقدت من نار فكري للمسافـات نـور
واليوم لاهنت ياشعـري مايخـدم بخيـل
مادام سلحتـك الافكـار مانـت معـذور
قدمك من العز مايروي ظمـا كـل جيـل
سوالفه تزرع الامجـاد فـي كـل بـور
وقدمك لميع الهنـادي والقنـا والصقيـل
وقدمك من المجد ماترويه كـل العصـور
مسافتـه عـز ماتنقـاس كيلـو وميـل
بركانهـا ماخمـد وامجادهـا ماتـبـور
ياموكب الشعر وقف واستمع لـي قليـل
حتى اني اعطيك للتاريخ رخصـة عبـور
سيـرة بطـل ماتغيبهـا حكايـة رحيـل
تبقى بوجه الزمن كالنحت فوق الصخـور
ماكانت ارض الجزيرة قبل ذاك الاصيـل
إلاتفكـك عقيـدة وانـحـدار ودبــور
نهارهـا كـم قتيـل وليلهـا كـم قتيـل
جنايـزٍ مالهافـوق البسيـطـة قـبـور
قويهم سلطتـه تسلـب حقـوق الذليـل
وشيطانهم ساد والظلم انتشـر والفجـور
وكلٍ لخصمه من اصناف العـداوة يكيـل
وصدورهم من جهلهم فالمعاصـي تفـور
ما للأمـن شجـرةٍ فيهـا مقـر ومقيـل
ولابينهم للمودة فـي الجزيـرة جسـور
هذا قبل هيـت تخطيهـا عيـون الدليـل
وهذاقبل سطوة القـرم العـزوم الصبـور
النادر اللي على العارض يهيـم ويخيـل
من يوم عمره عشر شوره غلب كل شور
من قو باسه صنع ممكن مـن المستحيـل
ومن طيب راسه يحل معقـدات الامـور
زهابه الصدق والاخلاص حمـل الصميـل
وسلاحه الدين والتقوى سـلاح الغيـور
جمَع شتات القبايل ليـن صـارو فصيـل
واخوان عقب التناحر والجفـا والشـرور
وحكم بشرع الكتاب اللي ماغيـره بديـل
وعم الفرح فالبلاد وسـاد كـل السـرور
لامـال ميـزان غيـره مايحيـد ويميـل
في سطوته ينكسر راس الجهل والغـرور
شخصيته مالهـا فـي كـل جيلـه مثيـل
تجف الاقلام وبمدحـه تضيـق السطـور
والله ليبطن ماجابـن ناقضـات الجديـل
مثله ولااقول في كـل النشامـى قصـور
ويالله يامستجيـب للـدعـاء ياجلـيـل
من عبدك اللي لك مطيع وذليل وشكـور
ترسل على قبر ابو تركي صدوق المخيل
وسمٍ يساقيه من غـر السحـاب البكـور
وتهـل فوقـه بسيـل مايلاديـه سـيـل
وترحم عظامـه وتغفـر زلتـه ياغفـور
وتجمع به المصطفى في جنتـك والخليـل
وتحفظ عياله مواكير الحـرار الصقـور
وإنك تجمـل وتهدينـي سـواء السبيـل
وتعصم لساني عن الزله وعن كـل زور
ولسماع هذه القصيدهــ
اضغط هنا
المواضيع المتشابهه 
ســـيرة بطل (( تركي 2000)) 
العرض العادي
