بسم اللـــه الرحمن الرحيـــــم ...



السلام عليكم

نتكلم في موضوعي عن الشاعر الكبير والشيخ " نمر بن عدوان "

اسم الشاعر :

الشيخ نمر بن عدوان الصخري من شيوخ (( بنى صخر )) قبيلة عربية مشهورة مواطنها الآن شرقي الأردن - شاعر علم - كان الشاعر أميراً للبلقاء اشتهر بنبله وكرمه وسجاياه الحميدة ..<< يعني باختصار أجودي >>

القصه :

توفيت زوجته وضحى وصار يكتب فيها قصايد يرثيها ويتحسّر عليها لأن زواجهم كان له سبع سنوات وعمره ما شاف منها شي شين .. بالعكس كان سعيد جداً معها .. وفجأة توفّت .. وفاتها كانت غريبة جداً .. يقولكم وضحى متعودة تحلب الناقة لزوجها قبل لا يجي بشوي عشان يشربه وهو طازج .. الزبدة انه بذيك الليلة جا بدري شوي وشاف خيال شخص عند النياق حقتهم فقام وصوبه بسهم لأنه ظن انه خيّال بيسرق من نياقهم .. واذا بالخيّال هذا هو وضحى وماتت في حينها

..
في روايه اخرى تقول ..

إنو وضحى كانت بنت خالته .. وماكان موافق في البدايه على زواجه منها الا بعد ضغط اهله عليه ..
وبعد زواجه بفتره صار يعشق زوجته ..

وفي يوم من الايام وبعد ماوضعت زوجته طفلها الثالث قبيل شهر رمضان .. إعتاد نمر بن عدوان انه يحلب الناقه بحكم ان زوجته تعبانه بعد الولاده.. ومره من المرات طلع مستعجل لصلاه الفجر ونسى حلب الناقه ..

طلعت زوجته وشافت انه ماحلبها ..وراحت تحاول تحلبها .. بس مارضت الناقه .. لأنها معتاده على نمر ..
راحت زوجته لبست ملابسه وحلبتها .. دخل نمر لبيته وشاف خيال رجال مع الناقه .. وصوب عليه ..
بس سمع صرخه زوجته..!! قرب منها .! واكتشف ان الرجال هو زوجته .."


طبعاً فيه روايات كثيرة لوفاة وضحى من انها توفت بطاعون ومنها انها توفت بجدري..

وفي كل الحالات نتج عن موتها قصايد حزينة وتقطع القلب ..

حتى ان هالقصه اشتهرت وتعددت رواياتها
واخبر ان اول البوم لراشد الماجد اتوقع انه غنى قصيده نمر اللي بوريكم اياها الحين



اترككم مع القصيده ..

البارحة يوم الخلايق نياما
بيحت من كثر البكا كل مكنون

قمت اتوجد وانثر الماء على ما
من موق عين دمعها كان مخزون

ولي ونة من سمعها مايناما
كني صويب بين الأضلاع مطعون

وإلا كما ونة كسير السلاما
خلوه ربعه للمعادين مديون

في ساعة قل الرجا والمحاما
في ما يطالع يومهم عنه يقفون

وإلا كما ونة راعبية حماما
غاد ذكرها والقوانيص يرمون


تسمع لها بين الجرايد حطاما
من نوحها تدعي المواليف يبكون

وإلا خلوج سايبه للهياما
على حوار ضايع في ضحى الكون

وإلا حوار نشقوله شماما
وهي تطالع يوم جروه بعيون

يردون مثله والظوامي سياما
ترزموا معها وقاموا يحنون

وإلا رضيع جرعوه الفطاما
توفت امه قبل اربعينه يتمون

عليك يا شارب لكاس الحماما
صرف بتقدير من الله مأذون

جاه القضاء من بعد شهر الصياما
صافي الجبين بثاني العيد مدفون

كسوه من بيض الخرق ثوب خاما
وقاموا عليه من الترايب يهلون

راحوا بها حروة صلاة الاماما
عند الدفن قاموا لها الله يدعون

برضاه والجنه وحسن الختام
ودموع عيني فوق خدي يهلون

حطوه في قبر غطاه الهداما
في مهمة من عرب الامات مسكون

يا حفرة يسقي ثراك الغماما
مزن من الرحمة عليها يصبون

جعل البختري والنفل والخزاما
ينبت على قبر به العذب مدفون

مرحوم يالي ما مشي بالملاما
جيران بيته راح مامنه يشكون

يا وسع عذري وأن هجرت المناما
ورافقت من عقب العقل كل مجنون

أخذت أنا وياه سبعة اعواما
مع مثلهن في كيف مالها لون

والله كنة يا عرب صرف عاما
ياعونة الله صرف الأيام وشلون

وأكبر اهمومي من بزور يتاما
وإن شفتهم قدام وجهي يصيحون

وأن قلت لا تبكون قالوا علاما
نبكي ويبكي مثلنا كل محزون

لاقلت وش تبكون؟ قالوا يتاما
قلت اليتيم اياي وانتم تسجون

قمت اتشكا عند ربع اعدامــا
وجوني على فرقا خليلي يعزون

قالوا تزوج وانس لامه بلاما
ترى العذارى عن بعضهم يسلون

قلت إنها لي وفقت بالولاما
ولو جمعتم نصفهن ما يسدون

ما ظنتي تلقون مثله حراما
ايضا ولا فيهن على السر مامون

وأخاف أنا من غاديات الذماما
اللي على ضيم الدهر ما يتاقون

أو خبلة ما عقلها بالتماما
تضحك وهي تلذغ على الكبد بالهون

توذي عيالي بالنهر والكلاما
وانا تجرعني من المــــر بصحون

والله لولا هالصغار اليتاما
وخايف عليهم من الدجه يضيعون

لقول كل البيض عقبة حراما
واصبر كما يصبر على الحبس مسجون

عليه مني كل يوم سلاما
عدة حجيج البيت واللي يطوفون

وصلوا على سيد جميع الاناما
على النبي يللى حضرتوا تصلون